Inspektorati Policore i Kosovës (IPK) ka rekomanduar suspendimin e shtatë zyrtarëve policor në Gjakovë, ndërsa tre prej tyre i ka arrestuar.

Dyshimet janë se zyrtarët policorë kanë keqtrajtuar një qytetarë në Gjakovë, i cili dyshohet se kishte kryer kundërvajtje në trafik, shkruan arbresh.info.

“Inspektorati Policor i Kosovës respektivisht Departamenti i Hetimeve përmes Linjës së Kaltër (numrit të telefonit pa pagesë 080003333) ka pranuar një ankesë nga një qytetar i cili ankohej për tejkalim të autorizimeve policore gjatë përdorimit të forcës nga disa zyrtarë policorë në Gjakovë. Ngjarja është raportuar të ketë ndodhur sot në orët e hershme të mëngjesit kur qytetari ishte ndaluar nga policia në Gjakovë fillimisht për një kundërvajtje në trafik”, thuhet në njoftimin e IPK-së.

Rasti është regjistruar në IPK dhe hetuesit janë angazhuar duke ndërmarrë veprime konkrete hetimore lidhur me këtë rast duke dalë në vendin e ngjarjes.
“

Ankuesi është dërguar për tretman mjekësor nga policia si pasojë e lëndimeve trupore që dyshohet se kanë ardhur nga përdorimi i forcës nga zyrtarët policorë. Pas disa veprimeve hetimore në konsultim me prokurorinë kompetente, hetuesit e IPK-së kanë arrestuar sot tre zyrtarë policorë (punonjës në Stacionin Policor të Gjakovës) që ishin të përfshirë në këtë incident”, njofton tutje IPK.

Inspektorati bënë të ditur se arrestimi i policëve është bërë me dyshimin se të njëjtit kanë kryer veprën penale “keqtrajtim gjatë ushtrimit të detyrës zyrtare” dhe

“lëndim i rëndë trupor” kurse me vendim të prokurorit të njëjtëve u është caktuar masa e ndalimit për 48 orë si dhe janë suspenduar nga detyra.
Lidhur me këtë rast, bazuar në autorizimet ligjore, IPK ka bërë rekomandimin për suspendim edhe të katër zyrtarëve tjerë policorë.

Hetuesit e IPK-së në konsultim të vazhdueshëm me prokurorin përgjegjës pritet të ndërmarrin edhe veprime të tjera hetimore lidhur me këtë rast për të sqaruar rrethanat e këtij incidenti.

Ndryshe, rastet e tejkalimit të autorizimeve policore kohëve të fundit janë shtuar. Veç këtë muaj janë regjistrua edhe dy raste të tjera. Polici Haris Kelmendi, i cili shihet në një video duke e keqtrajtuar një të ri, si dhe tre zyrtarë të tjerë, Drenë Jahaj, Milot Kelani dhe Valon Braha, të cilët kishin keqtrajtuar dy të rinj në kryeqytet. /arbresh.info/